- Det føles veldig bra å ha flytta til Vang, det er utruleg godt å føle på ein anna ro og eit litt anna tempo enn i Oslo, der eg har budd dei siste åra, smiler Guro Furunes Pettersen.
Oppdalsjenta er ikkje ukjent i Vang, ho har nemleg vore med i Vinjerock-eventyret heilt sidan 2014 og har lang erfaring frå fleire felt i festivalen. Difor er det kanskje ekstra gledeleg at Guro vel å slå seg ned i bygda på heiltid etter alle desse åra!
- Eg har jo vore her mykje i samanheng med festivalen og er relativt godt kjent, men eg har jo fortsatt mykje til gode å oppleve. Blant anna gler eg meg til å lære meg alle navn på områdene eg skal gå tur i, og til folk helser på meg i butikken - då er ein inne i varmen, ler Furunes Pettersen.
Frå ein draumejobb til ein ny draumejobb
Ikkje berre har Guro lang fartstid i Vinjerock! Ho har nemleg og brei erfaring frå kulturlivet ellers i landet, og har jobba blant anna for Norske Kulturarrangørar, Oslo World, Trondheim Calling, Kulturrom og Olavsfest. I tillegg har ho sidan 2020 vore bookingsjef for Vinjerock.
Og no er altså bookingsjefen booka inn som festivalsjef!
- Det er veldig gøy, for bookingjobben i Vinjerock har eigentleg alltid vore draumejobben min. No tek eg med meg den inn i stillinga som festivalsjef. Kan du tenkje deg ein betre jobb? smiler Furunes Pettersen.
- Eg hadde aldri sett for meg at eg skulle bli sjef nokon gong, men er det ein stad det må vera dødskult å vera sjef - så er det jo Vinjerock! Dessutan er ein aldri åleine i denna jobben, ein har eit fantastisk team rundt seg og utruleg mange positive folk, seier ho.
Guro fortel at det festivalsjef-stillinga kom på rett tidspunkt i livet. Etter fleire år i Oslo med koronajobbing og heimekontor, var tida inne for å lande stødig i Vang, med nye utfordringar i sikte.
- Det blir utruleg spennande å ta fatt på jobben. Det som er så artig med Vinjerock er at det er rom for å tenke annleis og vera kreativ, ein treng ikkje gjere alt etter boka - og det er veldig artig, smiler Furunes Pettersen.
- Eg trur det einaste eg gruer meg til er å seia nei, det er eg veldig dårleg på. Eg er veldig ja-menneske, så det kan bli ei lita utfordring, ler ho.
Og med det som einaste utfordring, ynskjer vi Guro varmt velkommen til bygda!
