Båe Joker-butikkane i Vang har snorklypping og opning fredag. Samstundes er det klart for «Julegateøfning» i Ryfoss fredag kveld, mens det laurdag er julemarknad på Joker Tyinkrysset.
Klokka ti opnar Joker Ryfoss dørene, mens det klokka to er offisiell opning klokka for Joker på Tyinkrysset. Båe plassar vert det snorklypping, underhaldning og sjølvsagt gode tilbod.
Julegateøfning i Føsse
I Ryfoss vert opningsdagen avslutta med den tradisjonelle «Julegateøfninga» klokka seks. Då vert alle lysa i julegata slått på, før det vert underhaldning, nissemarsj og gåveutdeling.
– Når alle stiller og gjer sin dyst, er det berre moro å vera med fortel Inger Kongslien Tveit i arrangørgjengen.
Butikkane, treningssenter, frisørsalong og Sara`s kafe held ope til klokka åtte med gode tilbod.
Det er Høre Røde Kors, Ryfoss Vel, Høre/Ryfoss il, YX Ryfoss, Joker`n, Annema frisør, Ryfoss treningssenter, Belindas hud og velvære og Sara`s kafe som står saman om arrangementet, mens Høre mannskor er på plass for å synge.
Julemarknad på Tyinkrysset
Laurdag er det klart for den tradisjonelle julemarknaden på Tyinkrysset. Her er fleire lokale mat- og handverksprodusentar på plass med sine varer.
– Bodane opnar klokka tolv. Det vert fakkeltog klokka tre, og halv fire kjem nissen, fortel Anders Hermunstad, dagleg leiar for Joker Tyinkrysset.
Han har ellers gode tilbod gjennom heile opningshelga og det same gjeld Intersport Tyinkrysset.
