Topptur

Påskeføre i Vang! Foto: Hallgrim Rogn

Topptur i Vang

Både bygdefjella og klassikarane over 2000 meter gjæve toppturmål i Vang.

Du kan ganske enkelt dele toppturtilbodet i Vang inn i tre kategoriar – kor ein kan velja tur og område etter tid og ambisjonar. Bra er det same kva! 

Jotunheimen

Om ein ser bort i frå Rasletinden og tinderekkja vidare innover der, som du når frå vegen over Valdresflya, er innmarsj det store aberet ved turing i Jotunheimen.

På pluss-sida er lite folk, store fjell, og ja, det faktum at du er i Jotunheimen.
 

Den greiaste måten å løyse Jotunheimen og topptur på er å vera med ein transport inn til Eidsbugarden eller Tyinholmen. Her er både Eidsbugarden Hotel, Fondsbu eller Tyinholmen aktuelle overnattingsplassar. 

Med tidleg start er fjell som Uranostinden, Snøholstinden, Galdeberget og Langeskavlen innanfor rekkjevidde. Det same er fleire klassikarar utanfor kommunegrensa.

Eit alternativ kan vera å gå inn til den sjølvbetjente hytta Olavsbu og gå toppturar herifrå. Stort meir eksotisk vert det ikkje.

Tyin/Filefjell

I Tyin–Filefjell-området er det fleire fine dagsturmål for den topptursugne. Skørsnøse er det mest brukte fjellet, med fleire fine alternativ for nedkøyring. Elles er Stølsnøse, Tyinstølsnøse, Søre–Knipen og Frostdalsnosi nokre av fjella som vert nytta til turing. 

Det fine med fjella på Tyin–Filefjell er at du stort sett tek høgdemeter rett frå vegen og at du går heile turen i ope høgfjellslandskap med god oversikt over omgjevnadane.

«Bygdefjella»

I fjellbygda Vang er det eit godt alternativ å spenne på seg toppturutstyret frå dei øvste gardane og starte toppturen. Mellom Slettefjellet og Vennisfjellet er det stort sett berre å sjå seg ut eit mål og starte turen kvar som helst – du tek høgdemeter frå fyrste stavtak. Purkeryggen, Møsåkerkampen, Mjellknapp Haukeberg og Belgjinøse er nokre tips.

Elles er det såpass bratt i Vang at mange andre bygdefjell også er aktuelle som turmål. Det kan vera alt frå Bergsfjellet og Grindadn til Hugakøllen og Gilafjellet.

Bildegalleri
Kunnskap på tur

Når du skal på topptur vinterstid har du to val. 1: Gå slake turar utanfor skredfarleg terreng. 2: Skaffe deg kunnskap og utstyr for å bevege deg i brattare terreng. Eit godt tips er også nettstaden varsom.no som varslar skredfare i Noreg. Leif Øyvind på Intersport Filefjell er ute kvar veke for å vurdere skredfaren i Tyin–Filefjell-området og melde inn til denne nettsida.